डॉ. चांदेकर अमरावती विद्यापीठाचे नवे कुलगुरू

म. टा. विशेष प्रतिनिधी, नागपूर

संत गाडगेबाबा अमरावती विद्यापीठाचे नवे कुलगुरू म्हणून नागपुरातील व्ही. एम. व्ही. कॉलेजचे प्राचार्य डॉ. मुरलीधर चांदेकर यांची नियुक्ती करण्यात आली आहे. राज्यपाल व कुलपती सी. विद्यासगर राव यांनी बुधवारी डॉ. चांदेकर यांच्या नावाची घोषणा केली.

अमरावती विद्यापीठाच्या कुलगुरू पदाकरिता अनेकांनी जोरकस प्रयत्न केलेत. परंतु, निवड समितीने डॉ. मुरलीधर चांदेकर, नागपूर विद्यापीठाचे विद्यमान प्र-कुलगुरू डॉ. प्रमोद येवले, औरंगाबाद येथील डॉ. के. व्ही. काळे, अमरावती येथील डॉ. एम. के. राय आणि डॉ. एस. ए. लडखे यांच्या नावांची शिफारस राज्यपालांकडे केली. या पाचही जणांनी बुधवारी संध्याकाळी राज्यपालांसमोर व्हीजन डाक्युमेंट सादर केले. त्यानंतर डॉ. चांदेकर यांच्या निवडीवर शिक्कामोर्तब करण्यात आले. यापूर्वी डॉ. चांदेकर यांनी राष्ट्रसंत तुकडोजी महाराज नागपूर विद्यापीठाचे प्र-कुलगुरू आणि गोंडवाना विद्यापीठाचे प्रभारी कुलगुरू म्हणूनही जबाबदारी सांभाळली आहे. नाशिक येथील यशवंतराव चव्हाण महाराष्ट्र मुक्त विद्यापीठाच्या बोर्ड ऑफ मॅनेजमेंट आणि अकॅडमिक कौन्सिलचे सदस्य, नागपूर विद्यापीठाच्या व्हीजन डॉक्युमेंटच्या समितीचे सदस्य, मुंबई विद्यापीठाच्या सिनेटचे सदस्य म्हणूनही त्यांनी काम केले आहे.

मोबाईल अॅप डाउनलोड करा आणि राहा अपडेट

राहुल काँग्रेसाध्यक्ष झाल्यास BJPला ‘अच्छे दिन’!

अक्षय मुकुल । नवी दिल्ली

राहुल गांधी यांच्या खांद्यावर काँग्रेस पक्षाची धुरा सोपवली जाण्याची जोरदार चर्चा असतानाच राहुल गांधी काँग्रेसचे अध्यक्ष झाल्यास भाजपला ‘अच्छे दिन’ येतील, असे वक्तव्य केंद्रीय मनुष्यबळ विकास मंत्री स्मृती इराणी यांनी केले आहे. राहुल यांच्यावर तोफ डागण्याचं कारण विचारता मला पत्रकार प्रश्न विचारतात आणि मी त्याचं उत्तर देते, असं हजरजबाबी उत्तर त्यांनी दिलं.

जेएनयू वाद, रोहित वेमुला आत्महत्या प्रकरण आणि अन्य वादांवर स्मृती इराणी यांनी स्पष्टपणे मते मांडली. रोहित वेमुलाबाबत संसदेत निवेदन देताना मी सगळे पुरावे समोर ठेवले. त्यामुळे विरोधी पक्षाने माझ्याविरोधात विशेषाधिकार प्रस्ताव आणला नाही. रोहितच्या जातीवर मी कोणतीही टिपण्णी केली नव्हती. मी वस्तुस्थिती मांडण्याचा प्रयत्न केला. न्याय मागताना जात मध्ये आणली जाऊ नये. न्याय सगळ्यांनाच मिळायला हवा या मताची मी आहे, असे त्यांनी जातीचं राजकारण करणाऱ्यांना सुनावले.

राहुल यांच्या हेतुविषयीही त्यांनी शंका घेतली. या वादांमध्ये माझ्यावर व्यक्तिगत आरोप करण्यात आले. जेएनयूमध्ये २००९ मध्ये लाठीमार झाला होता. तेव्हा राहुल गांधी तिकडे फिरकले नाहीत. आता मात्र दोन-दोनवेळा ते कॅम्पसमध्ये गेले. जे राहुल गांधी अमेठीत एखाद्या ठिकाणी दोनवेळा जात नाहीत त्यांच्या या कॅम्पसवाऱ्यांचा अर्थ काय काढायचा? हे सगळं मला लक्ष्य करण्यासाठीच करण्यात आलं, असा आरोप स्मृती यांनी केला. जेएनयू प्रकरणात सीताराम येचुरी यांनी माध्यमांची दिशाभूल केली असा आरोपही त्यांनी यावेळी केला.

राष्ट्रीय शिक्षण धोरणावर आधीच सर्वसहमती झाली आहे. प्रत्येक विभाग, प्रत्येक जिल्हा, सर्व राज्यांशी या धोरणाबाबत चर्चा झाली आहे. लाखो गावांनी हे धोरण कसं असावं, याबाबत मतं नोंदवली आहेत. सर्व स्तरांतील मुलांशी संवाद साधण्यात आला आहे. यूनेस्को, यूनिसेफ यांच्याशीही चर्चा झाली आहे. आता फक्त यावर संसदेत चर्चा व्हायची बाकी आहे. याबाबतची प्रक्रिया पूर्ण होईपर्यंत ती चर्चाही होईल, असे एका प्रश्नाच्या उत्तरात स्मृती यांनी सांगितले.

मोबाईल अॅप डाउनलोड करा आणि राहा अपडेट

सौरऊर्जा निर्मितीत महाराष्ट्र पाचवा!

भारतात ५ हजार मेगावॅटपेक्षा जास्त सौरऊर्जेची निर्मिती होते. या ऊर्जा निर्मितीत आघाडीवर असलेल्या १० राज्यांमध्ये महाराष्ट्र ५व्या स्थानावर आहे. देशात वीज निर्मितीत आघाडीवर असलेल्या महाराष्ट्राला सौरऊर्जेच्या क्षेत्रात राजस्थान, गुजरात, मध्य प्रदेश आणि तामिळनाडूने मागे टाकले आहे.

मोबाईल अॅप डाउनलोड करा आणि राहा अपडेट

गुलबर्ग खटला: २४ जण दोषी, BJP नगरसेवकासह ३५ निर्दोष

मटा ऑनलाइन वृत्त । अहमदाबाद

अहमदाबाद येथील गुलबर्ग सोसायटीत झालेल्या जळीतकांडप्रकरणी गुरुवारी विशेष न्यायालयाने २४ जणांची दोषी ठरवले, तर भाजपच्या एका नगरसेवकासह ३६ जणांची निर्दोष सुटका केली. . गुजरातमध्ये २००२साली उसळलेल्या दंगलीत अहमदाबाद येथील गुलबर्ग सोसायटी जाळण्यात आली होती.या हिंसाचारात काँग्रेसचे माजी खासदार एहसान जाफरी यांच्यासह ६९ जणांची हत्या करण्यात आली होती.

दोषींना ६ जून रोजी शिक्षा सुनावली जाणार आहे. दोषींपैकी ११ जण खूनाच्या आरोपात दोषी आढळले आहेत. तर इतर १३ जण अन्य गुन्ह्यात दोषी आढळले आहेत. ​न्यायालयाने दोषी ठरवलेल्यांमध्ये विश्व हिंदू परिषदेचे नेता अतुल वैद्यचा समावेश आहे. तर निर्दोषमध्ये भाजपचे नेता पार्षद विपिन पटेल यांचा समावेश आहे.

दरम्यान, निकालाच्या पार्श्वभूमीवर न्यायालय परिसरात तसेच गुलबर्ग सोसायटीत परिसरात सुरक्षा वाढवण्यात आली आहे. राज्यातील संवेदनशील परिसारत देखील पोलिसांना तैनात करण्यात आल्याचे एका वरिष्ठ पोलीस अधिकाऱ्याने सांगितले.

जाकिया जाफरी यांनी व्यक्त केली
नाराजी

न्यायालयाच्या निर्णयावर काँग्रेसचे माजी खासदार एहसान जाफरी यांची पत्नी जाकिया जाफरी यांनी नाराजी व्यक्त केली. या निर्णयाविरोधात यापुढेही लढा देऊ, असे त्यांनी सांगितले. न्यायालयाने २४ जणांना दोषी ठरवले याचा आनंद आहे. मात्र ज्या ३६ जणांची निर्दोष सुटका केली आहे. त्याविरोधात याचिका दाखल करु, अशी प्रतिक्रिया जाफरी यांची सून दुरैया जाफरी यांनी दिली. या जळीतकांडात एहसान जाफरी यांची देखील हत्या झाली होती.


गुलबर्ग सोसायटी खटला घटनाक्रम

२८ फेब्रुवारी २००२- अहमदाबाद येथील गुलबर्ग सोसायटीवर तब्बल २० हजार जणांच्या जमावाने हल्ला केला. या हल्ल्यानंतर ३९ जणांचे मृतदेह सापडले, तर ३१ जण बेपत्ता होते. पोलिसांनी ११ जणांवर गुन्हे दाखल केले.

२१ नोव्हेंबर २००३- गुजरात पोलिसांवर आरोपींना वाचवत असल्याचा आरोप झाल्याने सर्वोच्च न्यायालयाने यासंदर्भातील ९ खटल्यांची सुनावणी रोखली.

२६ मार्च २००८- सर्वोच्च न्यायालयाने SIT स्थापन केली. याच्या प्रमुखपदी सीबीआयचे निवृत्त संचालक आर.के.राघवन यांची नियुक्ती केली.

११ ऑगस्ट २००९- SITने आणखी २५ जणांना केली अटक आणि ६२ जणांवर आरोप निश्चित केले.

मे २०१०- सर्वोच्च न्यायालयाने अंतिम निकाल देण्यास मनाई केली.

२२ सप्टेंबर २०१५- ३३८ जणांची साक्ष नोंदवल्यानंतर खटल्याचे काम पूर्ण झाले.

२२ फेब्रुवारी २०१६- सर्वोच्च न्यायालयाने अंतिम निकाल देण्यावरील बंदी उठवली.

मोबाईल अॅप डाउनलोड करा आणि राहा अपडेट

मोदींच्या मांडीवर बसण्याशिवाय पर्याय नाही!

मटा ऑनलाइन वृत्त । नवी दिल्ली

पंतप्रधान नरेंद्र मोदींबद्दल केलेल्या वक्तव्यामुळे अभिनेते ओम पुरी अडचणीत येण्याची शक्यता आहे. ‘आता मोदींच्या मांडीवर बसण्याशिवाय काही पर्यायच उरलेला नाही’, असं वक्तव्य पुरी यांनी केलं आहे. ‘प्रोजेक्ट मराठवाडा’ या आगामी सिनेमाच्या निमित्ताने ते दिल्लीत आले होते. यावेळी पुरी यांनी हे वक्तव्य केलं.

‘प्रोजेक्ट मराठवाडा’ हा शेतकरी आत्महत्या आणि शेतकऱ्यांवर ओढवलेल्या बिकट परिस्थितीवर आधारीत चित्रपट आहे. यात ओम पुरी यांनी ‘तुकारम’ नावाच्या शेतकऱ्याची भूमिका केली आहे. या पार्श्वभूमीवर केंद्रातील विद्यमान सरकार आणि पंतप्रधान नरेंद्र मोदींबाबत ओम पुरी यांना प्रश्न विचारला गेला. ‘सध्या मोदींच्या मांडीवर बसण्याशिवाय आपल्याकडे काही पर्यायच उरला नाही. बाकीच्यांची कामं आपण पाहिलीच आहेत’, असं ओम पुरी म्हणाले. पण पुरी यांचं वक्तव्य हे मोदींच्या विरोधात आहे की बाजूने याचा कयास लावला जात आहे.

‘प्रोजेक्ट मराठवाडा’ हा चित्रपट प्रकाश पटेल आणि भावीन वाडिया यांनी दिग्दर्शित केला आहे. उद्या ३ जूनला हा चित्रपट प्रदर्शित होतोय. ओम पुरी यांच्या मुलाने आत्महत्या केलेली असते, अशी या चित्रपटाच्या ट्रेलरची सुरूवात आहे. चित्रपटात ओम पुरी यांच्यासह दिलीप ताहिल, गोविंद नामदेव, कुणाल सेठ, सीमा विश्वास, राहुल पटेल यांची प्रमुख भूमिका आहे.